jaleel+manikpuri(ghazal)

رات بھر وہ شمعِ مَحفِل بن کے مَحفِل میں رہے

دِن ہُوا روشن تو چُھپ کر گوشۂ دِل میں رہے

تِیر پہلُو میں رہے یا دَستِ قاتِل میں رہے

ہے غرَض اِتنی کہ تھوڑی سی کھٹک دِل میں رہے

دِل تو ٹُکڑے کرچُکے اب یہ بتاتے جائیے

آرزُو جاۓ کہاں ارمان کِس دِل میں رہے

میکدے کا راز مستی میں چُھپانا فرض ہے

ظَرْف جو رکھتا ہے وہ ساقی کی مَحفِل میں رہے

لُطف دُونا ہو جو دونوں گھر مِرے آباد ہوں

تُو رہے پہلُو میں تیری آرزُو دِل میں رہے

ہوش کیا جاتے جُنُوں میں چھوڑ کر تنہا مُجھے

وہ بھی کُچھ اُلجھے ہُوۓ طَوق و سَلاسِل میں رہے

پَردَہ داری لاکھ کی پَردَہ دَری ہوکر رہی

آنکھ سے ٹپکے وہی ارمان جو دِل میں رہے

جانے والے کب کے پہنچے منزِل مقصُود پر

ایک ہم اب تک تلاشِ خِضرِ منزِل میں رہے

وہ تو راہی ہو گئے صُورَت دِکھا کر اے جلیلؔ

مُفت کے جھگڑے ہمارے دِیدَہ و دِل میں رہے

جلیل مانک پوری